आमची बेटावरील सहल.
८ मार्च २०२३-आंतरराष्ट्रीय महिला दिन.
जानेवारी महिन्यापासून च आम्हांला वेध लागले बेटावरील सहलीचे.
ग्रुप एकत्र करायची जमवाजमव सुरु झाली.
त्रिगुण ट्रॅव्हल्स चे सर्वेसर्वा श्री. प्रविण सरांना संपर्क साधून सगळ्या माहितीची देवाणघेवाण झाली आणि आम्हां मुलींची ( अजून आम्ही मनाने तरुण आहोत) तयारी सुरु झाली.
अखेर ८ मार्चला सकाळी ६ वाजता आमच्या सहलीला सुरुवात झाली. आमच्या दिमतीला प्रविण सरांनी सुंदर वातानुकूलित, आरामदायी बसची सोय केलीच आणि त्याचबरोबर आपले आपुलकीचे एक उमदे, हसतमुख ,काळजी घेणारे, मदत करणारे असे व्यक्तिमत्व श्री. पराग यांच्या रुपात आमच्या सोबत टूर लीडर म्हणून दिले.
दरमजल करीत एक एक जणींना घेत आम्ही निघालो.
नंतर ओळख परेड ( औपचारिक) झाली. रुचकर पोहे आणि कोथिंबीर वडीचा नाश्ता झाला.
तत्पूर्वी काही गाणी, भजने झाली आणि मंगलमय, आनंदी वातावरण निर्माण झाले.
थोड्या वेळात चहाकरिता सुमन हॉटेल येथे थांबलो. महाड जवळील जेट्टीला पोहोचलो आणि तिथून स्पीड बोटीने मस्त निसर्गाचा आणि पाण्याचा आनंद लुटत नयनरम्य, स्वप्नवत् बेटावर पोहोचलो.
एक गोष्ट नमूद करावीशी वाटते की आमच्या सगळ्यांचे सामान श्री. पराग आणि त्यांची टीम यांनी सतत उचलून आम्हांला सहलीचा आनंद मनमोकळेपणाने लुटू दिला.
आपापल्या खोल्यांवर सामान पोहोचले. बेटावरील पाटील कुटुंबियाने कोकम सरबत देऊन आमचे स्वागत केले आणि नंतर सुग्रास जेवणावर ताव मारायला कधी सुरुवात केली ते कळलेच नाही. अहाहा! काय सुंदर, गरमागरम, प्रेमाने वाढलेले रुचकर पदार्थ ज्याची चव अजूनही जिभेवर रेंगाळते आहे. सुरमई फ्राय, तांदळाच्या भाकरी, सोलकढी( उत्कृष्ट चव), वालाचे बिरडे,बटाटा भाजी, पापड, दुधी हलवा इ. पदार्थांची रेलचेल असलेले ते जेवण करुन आम्ही पत्त्यांचे डाव रंगवले.

बेट अतिशय सुंदर, रमणीय आहे. त्यानंतर श्री. पराग यांनी ( प्रविण सरांच्या निर्देशानुसार) आम्हांला सरप्राईज द्यायला सुरुवात केली. महिला दिनानिमित्त सगळ्या मुलींना ( महिलांना) हातावर मेहेंदी काढायला दिली. छान, आकर्षक छोटेखानी सजावट करुन तेथे मेंदीचा कार्यक्रम रंगला.

नंतर मगर सफारी करायला बोटीतून फेरफटका मारुन आलो.
चहा आणि गरमागरम भजी खात आम्ही स्विमिंग पूलावर पोहोचलो. तेथे मनमुराद पोहत, भाजीचा आस्वाद घेत संध्याकाळ कधी उलटली ते कळलेच नाही.

संध्याकाळी तयार होऊन मस्त खेळ खेळण्याकरीता मुली तयार झाल्या. श्री. पराग आणि टीमने रींगचा खेळ, त्यानंतर हनुमान- कृष्णाचा खेळ, भरपूर नाचगाणी, फुग्याचा खेळ, वैयक्तिक मनोरंजन सादरीकरण ( आम्ही मुलींनी सादर केलेले) झाले आणि आमची संध्याकाळ रात्रीच्या जेवणावर कधी येऊन पोहोचली ते कळलेच नाही.
रात्री परत दिलेले रुचकर जेवण जेवून आत्मा तृप्त होतो न् होतो तोच त्रिगुण ट्रॅव्हल तर्फे अजून एक सरप्राईज समोर आले.
वुमेन्स डे स्पेशल केक पासून आदरातिथ्य कुठेही कमी पडले नाही याची जाणीव आणि आम्हांला दिलेला सन्मान याने मन अजून आनंदीत झाले.
अखेर पत्त्यांचा डाव रंगवून तृप्त मनाने महिला दिन साजरा करुन स्वप्नतारकांवर कधी पोहोचलो ( झोपलो) ते कळलेच नाही.
दुसऱ्या दिवशी सकाळी ७.३० वाजता बेटावरील प्रभातफेरी झाली. मनोहारी सूर्योदय, पक्षांचे किलबिलाट ऐकून प्रभात फेरी सार्थकी लागली.
चहा, पोहे, मिसळ पाव अशा दमदमीत नाश्ता आणि फोटो सेशन्स झाले
आणि परतीच्या प्रवासाची तयारी सुरु झाली.

जड अंत:करणाने बेटावरील टीमने आम्हांला निरोप दिला आणि स्पीड बोटी तून परतीच्या प्रवासाला लागलो.
बसमध्ये हाऊजी गेम खेळलो आणि दीक्षित भोजनालय, जांभुळपाडा इथे रुचकर जेवण करुन, तेथील पापड वगैरे पदार्थ खरेदी करुन घराकडे परत यायला निघालो.
श्री. पराग यांना मनापासून सगळ्यांकडून धन्यवाद. त्यांनी प्रत्येकीला केलेली मदत, आपुलकीने दिलेला मदतीचा हात, न कंटाळता आम्हाला दिलेली प्रत्येक गोष्ट, हसतमुखाने आणि आनंदी मनाने, उत्साहाने आम्हाला लहान मुलांसारखे दिलेले प्रेम वाखाणण्याजोगे आहे.
त्याचप्रमाणे इतर सगळ्यांनी आमची केलेली खातिरदारी प्रशंसनीय.
त्याचबरोबर जे backstage ला असलेले मदतनीस, आम्हांला पण काही ना काही रुपात ज्यानी मदत केली त्यांचे आम्ही ऋणी आहोतच.

आणि आता कळसाध्याय म्हणजे आपले सर्वेसर्वा श्री. प्रविण सर ज्यांनी त्यांच्या बरोबर काम करणाऱ्या सगळ्यांना इतके सुंदर घडविले आहे त्यामुळे च आपली सहल अतिशय अविस्मरणीय झाली. प्रविण सर शतशः नमन!
पुढील सहली आपल्याबरोबर जरुर करु.
धन्यवाद🙏🙏

Mrs. Leena Kulkarni